Bill 4 rawn lutte kha chu a hma daiha an pek thu leh an zir chian hman thu a sawi a. Chutihlaiin, he adopt tur resolution chu ni 27 a sawiho tur ni si kha ni 26 zanlai velah an rawn dah chauh a, an mut hun an nghak ni maia a hriat thu a tarlang.

"Kei phei chu zanlai pelh (zing lam) ah ka chhungte kai thovin an lo pe a, ka kal dawnah ka chhungten min pe ve chauh a, en pawh ka en hman lo hrim hrim. Adopt tur resolution an rawn dahah hian amendment rules & guidelines leh principal act pawh dah a ni lo hrim hrim. Resolution lut tur dah a ni a, zir chian ngaihna hman a awm lo reng reng. Ka MLA puite chuan House-ah an hmuh khan 8th assembly-ah an lo chai hrep tawh thu leh an hnawl tawh tih an hrechhuak a, sawi theiin an awm ta hlek zawk a. Inrawn hona hun pawh kan nei lo. Mahse, kan aiawha sawiten an dodal a, keini chuan kan tawm pui vek, pass dawn pawh khan 'remti' kan ti ve lo reng reng a, chhuah erawh kan chhuak tau hran lo. Inrawnkhawm hman kan ni lo," a ti.

Er. Rohminga chuan, "Chief Minister-,in kan enchiang ang a, a him loh chuan kan en tha leh ang ti zawnga a sawi khan min tithawveng deuh tak na a, mahse, adopt tum rukna hrim hrim awm niin a lang tlat. Achhanchu, resolution tur hi Cabinet-in May ni 13 khan agenda No 1-ah lo dah daih tawhin, khami ni khan an lo approve daih tawh a, chu chu kan hmu thei mai si lova, tun tumah ka han zawng hmu ta chauh a ni," a ti.

House-ah adopt tura hma an lo lak ruk daih tawh thu te, resolution hmu tlai a principal act, rule amendment copy-te anmahni an pek ve loh avangin, sawi ve vak theilo tura phuar ruk an nih thu a sawi. 

Thorang bialtu MLA chuan, "CM hian thu diklo a sawi leh a, hemi adopt-naah hian midang a mawh leh hi thil diklo a ni a. Sorkar hmasain an adopt duhlohna resolution kha, Legislative Assembly Secretariat-in Chief Secretary-ah an thawn nghal a, Lok Sabha Secretary General hnenah an thu passed kan duhlohna leh Mizoramah hman ve kan remtih loh thu House-ah lungrual takin kan passed a, ziakin an thawn thla nghal a nih kha. Huai deuh deuha kan CM-in thu dik tawklo a sawifo hi bansan tawh se ka ti ngawt mai," a ti a. Ram hmangaihna avanga chhuak tau lo a, an remtih laia an lo awm ve avanga dem an hlawh anih pawhin a thiam viau tih sawiin, ram tana thahnemngaih vang zawk a nih thu a sawi bawk.

Er. Rohminga chuan Assembly Session liam ta a, MLA ten ni 15 hma daih tawha an zawhnate chu vawiin dar 10 ral hmaa chhanna thehlut kim tura an ti chauh chu mak a tih thu a sawi bawk a. Zawhnate hi Minister-te kan zawt a, a chhanna pawh Minister-ten min pe tur a ni a. Hetih laia CM-in offial-te a puh leh daih hi thil diklo a ni a, sorkar inthlahdah leh nep vang liau liau a ni anih thu a sawi bawk.

Er. R. Rohmingliana MLA chuan ni August ni 22, 2025-a MPS General Conference-a CM thusawi tarlang bawkin, "Kan CM-in, 'Tun Independence day-ah khan police hnathawk tha, mipui pawhin an fak em em chawimawina dawng ngei tura an ngaihten chawimawina an dawnglo tlatin ka hria. Civil Society-te pawhin ti tha an tih luai luai Mizoram dung leh vang chiah hneh khawpa kan nau thawk thate pawh an awm. Medal emaw Award emaw an dawn ngeite ka lo beisei a, an dawng tlat lo a ni' a tih khan, ama sorkar ngei chu thil diklo tiah a puh a"

"Amah leh amah a intimualpho a ni. Kha ta lang chiang em em mai chu, kan police kan lo chhuan ve em emte a rin lohzia a tilang a. Amahin Minister duh taka a ruat Home Minister chu bang tura a nawrnaah ka ngai a, a zahthlak tak zet a ni. Khatiang khan midang ti ve ta se, banna an thehlut nghal vang vangin ka ring. Kan Home Minister hi a khawngaihthlak tak zet a ni. Kan Police chhuanawm tak tak chawimawina dawng tan pawh a nuam lo ngawt ang, kan CM meuhin khatiang khan a sawi si a," a ti bawk.

He Inkhawm hi H. Vanlalrawna Gen. Secretary chuan kaihruaiin, RC Lalhruaitluanga Secretary chuan hunserh a hmang.